Desde a Coordinadora Estatal de Asociacións Solidarias co Sahara, CEAS-SAHARA, queremos, en primeiro lugar, expresar a nosa profunda preocupación polo estado de saúde de Jalihena Abu Ao-Hassan, Ali Salem Ablagh e Brahim Baryaz, presos políticos saharauís en folga de fame desde o mes de febreiro.
O pasado 13 de febreiro estes tres presos políticos, defensores dos dereitos humanos, comezaron unha folga de fame co fin de denunciar as condicións inhumanas ás que están sendo sometidos polo réxime marroquí ante a pasividade da Comunidade Internacional que, unha vez máis, mira para outro lado ante a crueldade dos acontecementos que ocorren no conflito do Sahara Occidental.
Logo de case dous meses en folga de fame e como forma de loita pacífica ante as autoridades de ocupación marroquís, estes tres defensores de dereitos humanos, detidos por expresar libremente as súas opinións políticas e o seu defensa do dereito de autodeterminación do Pobo Saharauí, manteñen unha postura de dignidade e firmeza que está pondo as súas propias vidas en perigo, véndose obrigados a iso ante as continuas humillacións ás que ven sometidos polas autoridades penais da prisión de Boulemharez (Marrakech).
Ante esta situación, esiximos con firmeza non exenta de rabia á Comunidade Internacional que asegure dunha vez a celebración do referendo de autodeterminación como único xeito acorde a Dereito de pór fin a unha ocupación salvaxe que converteu o Sahara Occidental nun Guantánamo xigante a escasos quilómetros de Europa, onde se violan de forma sistemática os dereitos fundamentais con total impunidade.
Como cidadás e cidadáns europeos, mediante esta nota facemos un chamamento urxente ao Estado Español e á Unión Europea para que poñan fin a esta situación e conduzan todos os seus esforzos en favor da celebración dun referendo de autodeterminación xusto e vinculante, conforme ás resolucións da Asemblea Xeral da ONU, do Consello de Seguridade e da Unión Africana.
Finalmente, facéndonos eco do informe da delegación ad-hoc do Parlamento Europeo para o Sahara Occidental, presidida polo antigo ministro chipriota de Asuntos Exteriores Ioannis Kasoulides, solicitamos incluír no mandato da MINURSO, Misión das Nacións Unidas para o Referendo no Sahara Occidental, "a supervisión da situación dos dereitos humanos na rexión"; situación que se afasta considerablemente da que marcan os estándares internacionais de protección destes dereitos e que esta Misión contribuiría a mellorar.
José Manuel Taboada Valdés
Presidente CEAS-Sahara
C/ Pez, 27 - 1º Dereita - 28004 MADRID
